|
老師可將劇本預早交予角色扮演者,排演和調整節奏快慢。同學可以利用劇本,運用口語稍作修改,使演出更有親切感。 劇本的資料來源是綜合了美國數間大學的中古時代歷史科的課堂筆記。其中較為重要的,有史諾士博士(Dr. Skip Knox)網站所提供的資料。同工如有興趣嘗試利用角色扮演或話劇上課,去演譯這個課題的話,可自行上網取材,或與本中心翁國興先生聯絡(電話: 28578297)。 劇本1: (第一次東征) 情景: 教皇在1905年往法國考察當地教會的改革,11月18日至11月28日期間,他主持一個宗教會議,將法王菲臘以通姦罪逐出教會(excommunicate) 。他並且通知人民在11月27日,到東城門聆聽重要宣佈。帝王和大部份歐洲的貴族,都未能趕及到會。只有當地的平民在場。(當時的社會相當單純,平民普遍的教育水平很低,只有貴族和教士有機會接受教育。人民對宗教,有相當盲目的狂熱。帝王要靠教會神授君權地加冕冊立,所以教會的勢力很大。) 人物: 教皇烏爾班二世 (一個很有天份的演講家,他的說話強而有力。) 貴族黃金寶(一個縱情聲色犬馬的貴族) 武士華德(Walter Sans-Avoir)(一個充滿戰爭狂熱的戰士) 平民小明(一個農民) 平民小強(一個商人) 領主米落索維奇(布爾格萊特Belgrade城主) 土耳其王阿斯那(Kilij Arslan) 第一幕: 教皇的聖召 地方: 奇蒙特(Clermont)城的東城門一個臨時蓋搭的教壇。 教皇: 法蘭克尊貴的人民啊! 邪惡的土耳其人,正向我們東方的基督國度挺進。 基督徒受屠宰和凌辱,聖地受玷圬。 主耶穌的神聖的埋葬所(Holy Sepulchre)變了回教徒的寺廟。 我們的朝聖者,受到滋擾,又被禁止進入聖地。 西方的弟兄,起來抵抗,打一場正義之戰。 窮人、富人,所有人都該效力。 為主而死的,當得救贖。 不要懼怕! 主會帶領我們! 主的旨意呀! (Deus vult,這後來成了十字軍的口號。)
第二幕: 貴族的遲疑 小明: 喂喂 ! 你去唔去啊! 小強: 去唔去邊度? 小明: 舊年教皇話要東征,而家夏天啦都未郁,點解救啊? 小強: 你唔明啦! 我地位黃金寶伯爵點會肯去呢。 他又怕死,又驚外國入侵,靜係識搜括民脂民膏, 坐係度嘆,點肯聽教皇話出戰呢? 黃金寶: 喂! 你兩個企響度咪行住,竟然背著我鬧我,拉你地 去斬頭! 小強、小明: 饒命啊! 大人! 唔好殺我地啊! 黃金寶: 咁啊,就派你地去參加十字軍啦! 小強: 嘜野十字軍啊? 黃金寶: 個D心口有個十字,去東征耶路撒冷D兵就係啦! 埋哩幫你黏個十字係心口先! 小強、小明: 今次慘啦!
第三幕:布爾格萊特之戰 華德: 喂喂! 你地而家排隊入城! 小強、小明: 遵命! 米落索維奇: 喂喂! 咪行住! 你地幾萬人咁多,想去邊? 華德: 我地去東征! 你不如參加埋一份。 米落索維奇: 東征咁麻煩啊! 唔好啦! 你地有無錢,想入城啊? 無錢就唔得! 華德: 錢係嘜野?(當時西歐大部份地區,是使用以物易物方法交易, 亦沒有貨幣。) 小強: 大將軍,錢即係money,羅馬帝國時代係用金幣, 或其他貴價金屬造成,上面印左皇帝個嘜頭。 作為交易媒介,唔使D人拖住隻牛去換豬咁麻煩, 隻牛先轉錢,然後D錢再轉豬, 係唔係簡化左? 華德: 都唔知你講嘜野。咁點解而家我地又唔用呢? 小強: 因為外族入侵羅馬帝國,D金用來賠俾外族。 越來越少金。後來試過用鹽當錢使,所以人工 又叫造salary啦。終於整個金融體系崩潰,變成 諸候割據的莊園和城邑,自給自足,唔再有貿易。 教皇都話金錢係萬惡嫁。而家靜係得番東羅馬帝 國同埋阿拉伯先至用錢啦。我以前做生意,都係 用金粒,秤一秤,多左又咬開佢,都幾好用,唔 使用錢咁牙煙。 華德: 咁而家無錢都好慘,無飯開點算? 小強: 我地沿途,都係擺地攤賣野咋! 米落索維奇: 你地就想啦,我地唔俾無牌小販非法經營。 小明: 都無野好賣啦,連盔甲同鞋都賣埋囉! 小強: 不如俾面教皇,施捨下啦! 米落索維奇: 你地就想啦,我係東正教,點俾面教皇啊? 華德: 咁又唔得,咁又唔得! 一於屠城啦! 殺啊! 主的旨意呀! Deus vult! 米落索維奇: 今次死啦! (十字軍開始屠城,天主教徒對東正教徒進行宗教滅絕清洗。)
第四幕:最後一戰 (華德戰死,小明、小強被擒。十字軍全軍覆沒。) 阿斯那: 你地都算叻,打到離我個京城。好在我及時班師回朝, 將你地逐個捉。 小明、小強: 大王饒命啊! 阿斯那: 唔想死就唔好心口掛個十字啦。 咁你地以前係唔係武士啊? 小明: 我係農民咋! 小強: 我係商人咋! 阿斯那: 哪! 你地都有D用,唔係好似個D騎士咁,靜係識殺人。 都唔明佢地,係唔係無其他野好做。 小明: 你唔明啦大王,我地社會係按階級分工,各司其職, 互不干涉。國王將全國土地分幾份,交大貴族同教 會管理,大貴族就要交貢稅俾國王,並且訓練同供 應士兵俾國王。 教會就會幫國王祈禱,並且派教士幫國王治理國家, 負責文職工作。 貴族就好似兵蟻一樣,靜係負責戰鬥任務。 大貴族、小貴族、武士、僕人,由上而下, 一層階管另一階層,咁國家就會好安全。 我地農民就好似工蟻一樣,靜係負責糧食生產。 高大威猛,先至可以充當武士的僕人。 其他人多數要耕田,重有額外任務, 例如要幫武士起屋、送信。 每個星期,要幫武士耕田兩三日。多野做時, 要先幫武士做完,至可以番自己度耕田,其實 我地都好憎佢地D武士,不過要靠佢地保衛 家園就無法啦。我地今次都係被迫打仗咋! 阿斯那: 一個社會咁繁複,靜係靠幾個階層分工,點惦啊。 小強: 哦! 我地社會,科技落後,D人又迷信,又少同外 人接觸,做生意既人,D人當係賊。又話金錢萬惡, 屬於最低級既人種,好慘嫁! 如果想學一門手藝, 重要拜師學藝,同埋參加工會。 阿斯那: 咁我地既社會就自由一D,又多元化, 有科學家、有商人、有工人,醫生、會計師、 、建築師、銀行家呢D 專業人仕都好多, 所以工商業都好發達,唔使靜靠農業。 我地既商隊重去到好遠既中國,同當 地人做生意添。 小強: 咁好嫁? 不如我地都落地生根,係度造外勞囉! 阿斯那: 咁都得? 我地呢度,無人俾錢僱用外勞嫁。 不過,我地重有公開市場,買賣外奴,即係你地咁, 做左戰俘,就有資格做外國奴隸啦。哈哈! 小強: 咁咪要捱成世? 小明: 咁好食好住,都唔驚啦。呢度都比鄉下文明得多, 建築物宏偉美觀,食物又非常美味,周圍有靚花園, 街頭市集又日日開,生活多姿多彩, 第時賺夠至贖身,風風光光咁,回鄉探親都唔錯啊。 阿斯那: 咁咪係囉,安心留低咪好囉。人來,帶佢地去拍賣。 小強、小明: 多謝大王。
|